BALEI BA DONKAM BAN PYNNEH IA KA KHYNDEW BAD KA UM?
Ka khyndew bad ka um ki long ki khuiň mariang kiba donkam eh na ka bynta baroh ki kynja ba im ha sla pyrthei.
Nature's scar forever ..... Land slip due to intensive bun cultivation |
Ka khyndew nalor ba ka ai ïa ka bam, ki diengthang bad ki jingbam ia ki jingri ka kyrshan ruh ïa ka jingim briew bad ka ïoh ka kot jong ki. Pynban ka la don ka jingpynduh ba khlem sangeh ïa ka da kiba bun ki rukom kum ka jinghap bad tuid noh ka khyndew, ka jingpynduh ïa ki khlaw ki btap, ka jingtih madei mata ia ki mar poh khyndew, ka jingpynbam phlang kyrni ha ki pyntha bad ka jingbym nang ban pyndonkam bad pynneh ïa ka. Kine baroh ki la pynlong ïa ka khyndew ba kan duh noh ïa ka bor jong ka bad kumjuh ïa ka jinglah jong ka ban pynbiang ïa ka jingdonkam sboh jong ki jingthung jingtep.
|
Ka shim por ia ka mariang 600 haduh 1000 snem ban tei 2.5 cm. ka dewsboh (topsoil) hynrei ïa kane pat ka shim por tang shisnem ban pynduh da ka jingpyndonkam bakla ïa ka. Ki kaiphot ki ïathuh ba haduh 6000 million ton ka dewsboh ka duh noh man ka snem na kumba 80 million hectare ka jaka tang ha India. La pynshisha ruh ba ka jingshah rong noh ka khyndew na ki jaka bym don jingïada ka long 120 ton na ka shi hectare shisnem shisnem bad kane ka lah ban kiew sha ka 300 ton na ka shi hectare ha ka shisnem.
|
Ka jingduh noh ka ‘dewsboh bad ka jingshah rong ka khyndew ka wanrah ïa ka jingtuid lehnohei jong ka umslap bad ka jingbym lah shuh ka khyndew ban kjit bad bat ïa ka um hapoh jong ka. Nalor kata, ka pynduh ruh ïa ka sboh na ka bynta ki jingthung jingtep, ka jingdap khyndew bad shyiap jong ki pung um bad ki wah kaba pynlong ïa ki wah ba kin shlei bad pynjot ïa ki jingrep, ki mrad ki mreng, ki jaka shong briew, ki lynti syngkien bad kumta terter. Hynrei kaba kongsan eh na kine ka long ka jingktah ïa ka rep ka riang, ïa ki jingpynmih mar khlaw bad ïa ka jingïoh ïa ka um kaba biang na ka bynta ban ring um rep bad kumjuh ïa ka umbam umdih. |
Severe soil erosion due to unscientific stone quarrying and faulty cultivation in the hill slopes |